2003-07-05

Es waht a kolta Wind durchs Gassl

Long wor i sprochlos und hob ka anzigs Wurt gfundn in de letztn 10 Wochn. Wal des inkompetente Gschwafl iba de Pension oda Pensionsrefurm oda Pensionssicharungsrefurm hob i schoan nemma hearn gekinnt. Heint hamb se den fauln Zauba wenigstens a End gsetzt. A grauslichs noch dazua. A soziale Bankrotterklärung. I schom mi vur oll de Leit de in unsan Landln a soziales Netz aufgebaut hamb und de sich heint in seneare Gruabn wälzn wernt. Man mechet fost manen, bleder kennts neama kehm.

Doss de asozialn Hund gleichzeitig de degenen Fliega kafn miassn und doss im nämlichn Büdgebegleitgesetz de Erhöhung von da Parteinförderung mitbeschlossn wurn is, is jo wenigstns noch gach amol in an Togblattln vurkemen, wos de Sochn ah nit appetitlicha mocht. Oba dos se uns so im ollgemeinen Trubl es neie Asylgesetz hintn eingschmiert ham, macht mi traurig und nimmb ma de Luft zum schnaufn. Dagegn hamb ja sebn de Ostdeitschn an flottn Grenzverkehr ghabt.

Dabei vasteh i unsare Leitln, in de de Schwein es Geld ausn Sock ausaziehgnt, dos do ka Kroft mehr sein konn fir a groasses Gschra. Dos homb se sich nämle gschikt ausgedenkt, unsare Regierenden, de sauban Herrschoftn, de degene elendige Bagasch. Mit de Pensionen lenk ma se ob, wonn noaha dos nit glongt gibt’s eh noch de Fliega, homb se sich gedenkt und bei da Hintatir loss ma de skandalösn menschnverochtendn Gsatzln mitn Badnweilermarsch durchs Parlament tonzn. Wal wer werd se bei den gonzn Schlamastik noch um de Nega und Tschuschn pfeiffn.

Es is zum schomen.

Und es kimmb ma fir ols obs im Gassln trotz de 38 Grad draussn, wieda a bissl kälta wurn war.

In olle an schean Gruaß, - bis noch da Summapause

Da Gerbergassler