2004-03-10
Es Gassl hot gwählt
Hiatzt hob is also gschofft, doss i mitn Jännaloch in Feber ah noch gstopft hob, oba in März wer i holt nemma umabringen. Drum heit wiedar amol a Gerbagassla.
Und wos kennt mi natirle ondars aus der degenen Beschaulichkeit aussareißn, ols wia de Wohln. Wal mir san jo gestern bam Lieblingswirt im Gassln zsammghukt, a beileifig zehn Mandar, und hom natirle fest dischkariert, iba des wos ausakem is, bei dera Obstimmung. Es wichtigste Ergebnis vurweg: In Haida gwählt hot kana, obwohl vierkommazwa eam eigentle gwählt hobn miassetn. Es is wohl ana nocha, wia ma schoan recht ongsoffn worn, ausagruckt mit da Forb, und hot zuagebn dos ea aner von de138.651 Terzn gwesn is, oba de an dreikommazwa hom se ums vareckn nit gmeldet. Und des is jo des Hauptdilemma, fia de Bagasch. Jetzt gwinnent de Hirschn de Wohl suwaren, oba frein dirfn se sich lei gonz klommhamle, wal wer stehtn schoan gern ols Teschek do.
Oba aus meina Sicht hot da Jörgl de Wohl jo gor nit gwunnen, sondarn de an homb eahm de Stimmen mit da Radltrugn zuwegfiat. Wal fir de Schworzn war, mit senan glorreichn Schissl im Hintagrund, wohl bessa gwesn, wonn se es Wörtherseemandl aufgstellt hättnt. Nocha warnt se in Klognfurt aufdwenigst Dritte gebliebn. So seint sogor de Grianen iba de Scheucharin dribagfohrn, nit lei da Strasser in Wean.
Und noachan erst de Roatn. In de letztn zwa Monat zehn Prozent Vurschprung auf de Blauen zum vajuxn, war jo on und fir sich a Kunst. Oba da Ambrozy Peta kon des ah. Noch bessa, der hot den Vurteil glei in viea Prozent Rückstond umgwondelt. A Zaubara. Den zaubats durchs gonze Lond. Daher mei Vurschlog on de roate Spitze. Gebts den ormen Peta noch a vieate, fünfte und sexte Schons gegens Jörgele. Und wonn ea a bissale Glick hot, noha stirb da Haida vur eahm.
In de Grianen is lei zum gratulieren. Du muasst lei long gnuag zu an Bam zuwebrunzn, doss dea endle austreib. Oda umfollt. Wal trotz albanischn Wohlrecht und trotz Kärntna Bauankultur im Londtog einzummaschiern, ringt ma högxstn Reschpekt ob. Und fesch is es Glawischnig Luada jo, nebnbei gsogt, wohl ah.
Iba de Kummara is nit viel gredt worn, und des obwohl Ondare von an fuchtzgprozentign Zuawochs lei tramen kennent. Oba 1937 Stimmen bleibn holt ollwal lei nullkommasex Prozent. Vadeant hättnt se sich mea. Bitta is holt lei, doss de SAU glei ausn Stond und ohne Aufwond, glei bold dopplt so vül, im Villacha Wohlkreis gmocht hot, wia de dunklroatn. Dos seint de Zeichn da Zeit. Ka Programm ols Programm und 3 In-Lokale in Villach seint anskommazwa Prozent. I gratulier uns.
Und de Moral von dera Gschicht : Wonn gonz Österreich de Freiheitlichn holbiert, noha werma mir Kärntner Stuarschädl, oba gonz genau es Gegntal tuan, und zagn wo da Partl in Most herholt. Und dementsprechend wird hiatzt da Jörgl in Schissl in Wean fünf Johr spaziernwatschn. Oda da ane haut friha in Huat aufe und auf Brüssl ausse ob.
Und schoan seint de Omlettn wieda umgedraht.
In olle an schean Gruaß
Da Gerbagassla
