2004-06-16

Iban Gasslrond amol a bissl dribagschaut

On de tirkischn Freind

Iba den Schotten muaß Eiropa springan

Wals hiatzt holt grod in Mode is, iba Eiropa, de EU und den Beitritt von de Tirkn zan dischkrian, muass i heint amol iba de Drau dribaausse schaugn. Und dos derf jo wohl nit wohr sein, wos in den Zusommenhong bei uns passiert. Olle viea Parlamentsparteien homb, wal sa se vur da Wohl zan eiropäischn Parlament in de Hosn scheissnt und Ongst homb, doss se gach neamma zan Trog ghemmant, propagiert, doss de tirkischn Menschn, de wos in de Augn von olle eh lei Untamentschn seint, wal se jo nit reif fia unsa Supaziwilisation seint, in da EU nix valurn homb. Punktum. Ka Wiedared, ka Aufschrei, nix.

Hiatzt tat i amol sogn, doss unsare westlichn Systeme, an gonzn Haufn Grind hättnt, doss se sich vastärkt um de Tirkn bemühn solltnt. Allan wos de westlichn Demokratien in de Muslime auf da gonzn Welt in de letztn Johr Elend gebracht homb, war schoan Grund gnua, doss aufdwenigst de EU de Hond ausstreckt und an dem Projekt weitabaut, doss fir mi ols anziges richtiges Argument für de EU giltet. Nämle da Friedn. Oba wals jo um Wählastimmen geht, is auf den scheinbor gschissn.

Ibahaupt wonn da de Heimatverbände und Komarodschoftsbind in unsarn Landle onschaugst. De dapocknt jo nit amol, doss unsere südlichn Nochborn, de Slowena, hiatzt zua EU gkearn.
Deswegn dem Feldner und in de degenen Konsortn vom KHD ins Stommbiachl einegschriebn: Geht’s sterbn, des Oarschlöcha. Wal erst wonn da letzte von eiara Denkungsort werd unta da Erdn liegn, wer ma mir ondan an Friedn kriagn. Und dos sog i da hiatzt nebnbei noch, Feldnerwirschtl. Sog du nit noch amol zu mia oda Leit de so denknt wia i, doss ma mia Nestbeschmutza warnt und uns schleichn sollnt. Reiss lieba du zommt deine sauban, nationaln Bagasch aus mein Lond ob, wonn da wos nit passt.

Dos oba hiatzt olle ondarn von de poor oltnationaln Hansln, sich de Antitürkeiideologie aufs Auge druckn lossn, dos will ma nit ins Hirnkastl eine und wird se hoffentle wohl in da nextn Zeit noch de EU-Wohln wieda einrenkn.
Wal ans sog i eich. I wer so long i leb, an de Idee von friedlich zsommenlebende Mentschn auf da gonzn Welt glabn. Und aus dem Grund wird mir kana vabietn, doss i fürn EU Beitritt von da Türkei bin.

In olle an schean Gruaß

Da Gerbagassla