2004-12-07

Bei uns im Gassln blinkn nit lei de Weihnachtsliachtalan

Herschoftssymbole oda iba de Moßregelung da Massn

Herrschoftssymbole

So, hiatzt hon i ma, onlässlich von da Eröffnung von da neien Bruckn und da neien Stroßn, amol de Orbat ongeton und hon de Ompln gezöhlt, de wos da Manze mit seina Truppn ibas Gassl hot khemmen lossn. Und seits ma net bes, oba des kimmb ma vir, wia wonn ane von de biblischn Plogn iba unsa kommods Stadtle khemmen war.
Dos enk a Vurschtellung mochn kennts, hob i beischpielhoft den Obschnit vum Durchloss weg, bis zum Mercedes, zum Theissl, in da Heidenfeldstroßn gnummen. Dos seint exakt 2,2 Kilometa. Und auf der immens longen Schtreckn homma mia 13 Ompln untagebrocht. I hon des in mei Rechnmaschin einegetippet. Olle 169 Meta und 23 Zantemeta hon ma mia an Liachtabam aus Roat-Gelb-Grean. I man holt wohl, doss des normalaweis a Eintrog in den Biea-Opel-Biachl wert war. In den degenen Guinnes-Rekord-Buach.

Und hiatzt sog i enk glei, doss lei a schlechta Mentsch denkt, doss unsa Omplwold mitn Orbeita-KaZet in da Siemensstroßn zsommenhänkt. Wal mit da Onwesnheit von da Infinion bei uns im Gassln hot, de Menge on in da Schtodt vataltn Ompln, oba genau gor nix zan tan. Wal de von den ibaaus mentschlichn und fürsorglichn Konzern, de wernt jo wohl net auf de poor Netsch von de poor Ompln ongwiessn sein, wo se senarn Rubel haupsächle aufn Banksektor reissn. Eh klor. Wo schoan a Marie is, kimmb wieda ane zuwa.

Na, de Ompln, liabe Mitbewohna vom Gassln, seint a reine Untawerfungsgeste, a Demonstration von senan Mochtrausch, aus den de degenen Schweinsteifel bold amol ausagebeitelt gkearnt. Dos is so wia wonn ma friha Lond in Besitz gnummen hot; ma hot draufgebrunzt. Und de Krippl, dos degene unappettliche Gmisch aus Politika und Konzernmentschn, brunznt uns senare Ompln ins Gassl eina, zum Zeichn, doss unsa Gassl schoan senen kheart und dos ma mia eh nix meha zan meldn homb.

Darum ruaf i zan erstn „iba-de-Ompln-nochdenk-Bewerb“ auf.

Zan gwinnen is a Schtickl Selbstochtung und a Potzn Ziwilkurasch.


In olle an schean Gruaß

Da Gerbagassla