2003-05-30
Was in Gerbergassler de Demokratie wert is
De degenen Gfrissa. Hiatzt hamb se wieda einegegriffn in unsare Sackln. Is eh bold nix mehr drin, wal es christle-soziale-witschaftswunderliche Ex-Maschele, da Schissl zsamt sein Lehrbuam, in Autovakäufa aus Unterkärntn, bold ols ausagramt wern hobn. Oba nit dos des hiatzt mants, i wer iba de Rentn oda ibas Gsundnsystem siadn, na, des datrogt da glernte Kärntner, wal uns is eh ollewal olls vasprochn, oba nia nix gholtn worn.
I red hiatzt amol von de unappettitlichn Hund untn in Klognfurt, im Londtog. Sitznt de Dolmen nit beinond, und hamb wieda amol nix zum tuan. Sog da Ane zum Ondan: „Waßt wos. Mia hama ka Göld, des habts ka Göld. Tua ma holt de Parteiferderung a bissale aufeschraufn.“ „Jo“, sag hiatzt da Ondare, „gor nit so a bled Idee, oba lei wamma uns ah a poor greaßare Dienstwogn kafn dirfn, nocha stimm ma mir zua.“ „No guat,“ sogt da Ane, „vadoppl ma uns holt de Parteiferderung und de Dienstwagalan san gschenkt. Hond drauf, - gült.“ Und da dritte haut sei Pratzn ah noch drauf, damit olls sei Richtigkeit hot. Und nit doss des mants dos se epa den prozentuell zsammgraftn Tal von de Wohlen manent. Na, den Socklbetrag hamb se sich um hundat Prozent aufgfettet, sprich wuarscht wiavül dos de Stimmen kriagst, es Mudlach werd praktisch automatisch in Oarsch eine gschobn. Wal es kennt jo leicht sein, doss de Blauen oder, wonn des Ex-Maschale so weiter tuat, de Schworzn, auf amol in Kärntn so bled dostehn tatn, wia hiatzt nit unlängst de Blauen in Niedaöstarreich. Jo und do war wohl recht wonn derwegn ah Gerschtl dowar, praktisch Fixum. De Rotn natirle a dafir, wal wo wos ausaraucht, do seint se ah bei da Musi dabei, ka Froge. Do haltn se zsommen wia Pech und Schwefl. Do is senen de Forb auf amol komplett wuarscht, Grundsätz sowieso. Do gehts jo ums Flüssige, quasi Existenzsicharung. Und do is ma es Hemd ollwal gleima wia da Rock. Lei gleich wia bei da 10 Prozent Hirde firn Londtog. In so ane Fälle sieghst erst noha wia guat de Briada mitanonda Freind sein.
Dos de degene Bagasch noch kana mitn nossn Fetzen aus unsarn schean Landlen ausegjogt hot, will in mei Birn nit eine. Wia arrogant, schenant und unmoralisch muaß ma den noch sein, doss in de Leit es Hefele ibagean tat. Treibs de assoziale Bruat ausn Londtog aussa, und hasts es wieda amol indast wohin in a Orbat gehn, dos de Krippl wieda amol gspiarn tatn, wia hort des Geld vadeant werd, wos se mit volle Händ ba de Fenster auseschmeißn.
Und nocha hamb se es Obagsicht gfragt, ob des richtig noat wor, des se se hiatzt de dopplte Marie genehmign. „Jo freilich,“ hot ea gsagt, „is des Noat. Erstens is ols teira wurn und zweitens werd uns des de Demokratie wohl wert sein.“ Und donn frog oba i di hiatzt, Londeshaiptling, ah wer hotn nocha de gonzn Sochn teira gmocht und in a poor tausnd Leit allan in Kärntn de Orbat untan Oarsch weggezogn?
Ajo, - gonz genau, mir selba werma des gwesn sein. Mir hama des gschickt eingfadlt. Zerst fiah ma den Eiro ein, nocha hom ma mia 10 Schilling fia 1 Eiro umgrechnet, und nocha hom ma uns sölba ausseghaut. Oba vurher homa noch gschwind de Wirtschoft zgrundgrichtet und es Famüliensilba vascherbelt. Genau so werds gwesn sein.
Und deswegn wea i dir hiatzt amol sogn wos mia dei Demokratie wert is: Nit amol ein feichtn Schaß. Moch du in dein Klogenfurt untn dei Demokratie, oda dos wos du dafir holtest, oba loss mi onglanta. De wohrn Asozialn seids nemle des, du und deine bedirwign Briada, de ehrnwertn Herrn Politika. Es Mauschla - und Lugnpack.
Es lebe de Demokratie.
In olle an schean Gruaß
Da Gerbergassler
