2003-06-20
Über wos da Gerbergassler so nochsiniert
3 Sochn. – Kane weltbewegend, oba anfoch zum spekuliern, wias heite so laft in dera Welt.
Es erste. Do hamb se hiatzt de BBAG in de Hollända vadraht. Und des muaß man se schon auf da Zungen zagehn lossn. De BBAG hot in Östarreich an Onteil am Biermorkt von 60 %. Also, ka Noat dos ma den Betrieb in irgend ana Ort und Weise vatscheppern miasset, wal allan vurigs Johr hamt de an Gewinn von 80 Mio Eiro gmocht. Wos ka Schas is, ibahaupt, wonn ma den Pletsch ins olte Geld hintarechnet. Nocha is es nämle iba a Milliarde Schilling. Oba leida fir de Herrn Bierbraua nit genua. De hamb de Braut sauba aufgmaschlt, doss se bei da Tandlarei gnuag mitschneidnt. Wal de Provisionen vom Büche Korl mechet i jo gor nit kennen. Und donn hot se der Flox umegstellt und in de Österreicha groaß vakündet, doss eh ols beim Oltn bleibt. Von de 7666 Orbeitsplätze is kana gefährdet. Najo, dos wer ma uns in an, zwa Jahrlen nocha anschaugn, wia dos ausschaut. De Börse hot oba schon gestern blitzortig reagiert. 30,97 % plus in an Tog. Und es Töchterl, de Brau Union hot gor 41,86 % zuaglegt. Bei bade Firmen gonz vurn dabei, grissenaweis genau da Büche Korl. Es kummt holt do zerst es Fressn und nocha de Moral.
Es zweite. In Reichhold Mothe zohlt hiatzt da Stronach 500.000.- Eiro pro Jahrle. Des kimmb ma lei derwegn entrisch vir, wal wos soll da degene Hihnazichter in de Autobauern schon fia a groasse Hilf sein. Oda hot dos epa mit de Eirofeiter Kompensationsgschaftln wos zum tan ?
Es dritte. Und Gott seis gedankt endle amol wos positives. Es wernt hiatzt schon mehr Cedes ( nit dos des hiatzt glabs, doss i Mercedes nit richtig schreiben konn ) schworz vom Netz obagezogn oda kopiert, ols gekaft. Weita so Leitln, wal des is fir mi de anzige Form von ziviln Wiedastond. Mia mias ma de Kapazunda nämle genau durt dawischn wos senen am meistn weh tuat. Nemle bei da Marie. Fertn hamb se 7,9 % valurn. Bei de Ami sogar 11,2 %. Und darauf hin hamb se a Erinnerung ausageklopft, nochzumschaugn und lesn in da Klanen vom 3.5.2003, Seite 91, „ When you pirate MP3s, you´re downloading Communism.“ Also: Wonn du MP3´s vom Netz obazupfst, lodest da in Kommunismus. A scheanas Kompliment kennetn se uns gor nit mochn. Mia sein wenigstens auf dem Gebiet am richtign Weg.
Traurigaweise bekanntzugebn war noch, doss laut Kärntner Wirtschaft vom 2.5.2003, da Karl Marx, geb. 8.11.1961, whf in 8561 Söding, mit seina Installationsfirma tschare gongen is. Hoffentle ka schlechts Zeichn.
In olle an schean Gruaß
Da Gerbergassler
