2003-09-05
Ibas Lebn und Sterbn im Gassln
Grod kimm i von meina Summafrisch zruck Do mant de Gehrer Liesl, doss se ma iba de Zeitungspartie ausrichtn lossn miasset, doss ma mia jungen Leit zviel auf de Festln umahengen tatn und zwenig Kinda damochn. Guat hob i ma gedenkt. Zsommdaklaubt host di iban Summa wolten guat, do wars holt lei noch ums dribagehn. Wia i schoan noch da Gerbagasslarin plarr, denk i ma, - halt amol. Moment ! Wos tua i denn in de klanen Poppa guats, wonn i se in de degene Welt setz ? Wia wernd ses denn amol hobn, in dera Gsellschoft ? Mit welchn Gscher wernd se sich denn durchrafn miassn ? Und je mehr i so sinnier, desto mehr steignt ma de Grausbirn auf. Zum Schluß beitlts mi lei so her, wonn i lei drauf aufdenk, wos ma de Kindalen olls wernd daleidn miassn. Also sog i zua Gerbagasslarin, leg di wieda on, - mia geahn auf a Festl.
Und do muasst di noha schon amol frogn, jo wer schofftn eigentle de grauslichn Bedingungen, de wos in de jungen Leit de Ongst mocht vurm Kindakriagn ? Wer draht den gor a so on da Turbokapitalistnschraufn, doss sich bold kana mehr ibas Kindamochn driabatraun werd ? Und wer mochtn de Ongst, doss se uns olls Auslenda mit an Tschippl Kinda ins Gassl holn wernt, de wos nocha in Hintahof aufn offenen Logafeiale senare Hammln brotn wernd, jo wer mochtn de Ongst, wonn net es katholische Trochtnpaarle aus Tirol ? Jo solong so ane gschissenen Leit wia de Gehrer und da Kohl wos zan redn homb, homb de Mentscha jo recht, wonn se kane Kinda in de östarreichische Realität setztn wolln. Wonn se nit amol wissnt, ob se selba de Kurvn bei den hellischn Tempo dakrotzn wern. Schpid kills, - hot ana amol zum Motto gmocht. Und dos trifft zua. De Gschwindigkeit daschlogt uns hiatzt schoan. Wosn nocha erst unsare Kinda.
Dabei war jo vül ehrlicha, wonn se sogatn, doss se sich senare fettn, durchs horte Orschpudern vadientn Rentnen, nit von so lahme Hundling wia uns vamassln lossn. Des Geld war wohl recht, wonn se sich dos noch einahn kenntn. Wohl verdiant, wia se sogn tatn. Oba wal se holt sehgn, doss sich des mit de Rentnen, bei senara Wirtschoft hintn und vurn nit ausgehn wert, dazöhln se uns settene Raubasgschichtn. Dabei war de Lösung von dem Problem, ongesichts von da Lisl und dem Anderle gor nit so schwar und wohrscheinle de weitaus gscheidare.
Sterbs holt des a bissl friha.
In olle an schean Gruaß
Da Gerbagassla
