2004-08-03
Es Gassl steaht wieda Kopf
Kirchtog
De Hinter- und de Vurdaseitn von da degenen Brauchtumswochn
Schean hobm se unsa Villach wieda ausageputzt und aufgekränzt. Wo de hinschaugst, tuats lei so blitzn und funkln. Vur ollm kimb ma vir, da Weg, durt wo da Umzug maschiern werd, glänzat besundars schean. Is oba eh logisch, wal wer schaug schoan gern hinta de Fassadn eine.
Und du sieghst schoan bei de Mannda den Glonz in de Augn, wonn se auf de Räusch denknt, de se in de näxtn Tog wieda hamzan wernd. Und bei de Weibaleut merkst schoan, doss se sich a bissale enger anlegn tuan, doss de Tutalan feling schoan ausahupfn mechtn, in freidiga Erwartung von de poorungswillign Schpagure. Und erst noaha de Kindalan. De dawortnt jo gor neama bis ongeht, es olte, ibaliefate und so vül scheane Brauchtum und se endle aufs Ringlgschpül aufekemment.
Es Magistrat hot ah a gonze Wochn frei, allan schoan, doss da gonze Stress von da Vurbereitung, de wos eh a guats Monat gedauat hot und praktisch olle Monn beonschprucht hot, von de ormen geplogtn Hund, bei a poor holbe Biea aufn Festpakur obbreckln konn. Dakennen werst se oba eh net, wal de Mastn seint wia im Fosching maskiert.
Jo, es is holt Brauchtumswochn in Villach, wal Kirchtog konnst jo feling neama sogn, wonn dos degene Schpektakl schoan 10 Tog dabert. De Lederhosnen wernt ausagrissn, de Dirndlkladlen aufgebigelt, ols natürlich lei Original Trochtn, zwor aus de Neinzgajohr, dafir umso modischa, und schoan geht de Gaude dahin. A jo, auf de Bank geahn sollt holt wohl kana vagessn, oda aufdwenigst da Oma ihrn Schporstrumpf plindarn, oda holt sunst indastwiea an Knedl aufstölln. Wal deswegn werd jo dos gonze Remmidemmi ibahaupt aufgführt. Dos da Brauch nit obkimmt. Der vom Ausnehmen und Rupfn.
In olle an schean Kirchtog
Da Gerbagassla
