2003-02-05
Wos da Gerbagassla so wöhl'n tat
Nurdkorea is a Schaß gegen unser Gassl. Eh schon wissen, da ausgfressene Diktator, da Choe Jin Su, den was se ibarall aufghängt ham, lei halt nirgends mit an Strick. Den sei Fressn kann in ganz Nurdkorea kana mehr segn.
Und so is mir gestern ah gangen. Da war i wieda amol auf an Strawanza. Wia holt olle zwa Tog amol. Und da walzl i so durchs Gassl ham. Und olle por Meta lachnt di de Poppnheima von senare Christbama an.
Olln voran da Kaisa, da President, da Capo Gruppo - unser Manze. A Lokfiahra wira im Bichln steht. In Blick vuraus, de gonzn Beiwagelen, oda soll i sagn, de Bonzngeigalen, hinta sich nach, alls voll auf Schiene. So zohnt ea mi guat a Dutznd mal an. Oba mi wundert, dass kana des hinterfotzige Grinsn sieght, wanns genau umeschaugs. I siegh eahm ja schoan, wira sich hamle de Händ reib und im Hirnkastl schoan de Marie zöhlt, was ea bei da näxtn Petite reißn werd. A bissl Ablenkung mit an altn Häusln auf da echlan Seitn von da Drau und an Klettergartln am Kaiserjosefplatz obn. A Scheingefecht da , a Fintn durt. So wia bei de degenen Boxa. Links andeutn und rechts voll in de Fressn. Und lei kane Hemmungen.
Vadrah lei olls, Manze. Es gheart ja nit dia.. Weg mit da Dreckfiararei und de Gartler, weg mit de Kanalrama und de Bestatter. Vielleicht naha als näxtes es Spitol und de Oltnbetreiung. De Kindagartn und de Schualn gabats als Zuawog. Und wal ma des Wassa nit durch de Schneekanonen jagn diarfn, vaschacha mas hiatzt holt in a por Freindaln. Und a bissl a Mudlach werd ja wohl fir di und deine sauban Briada a noch ausaschaugn. Halbntal offiziell, halbntal holt woarscheinle unta da Hond
Und do seids ja olle de gleichn Stirzla, wonns amol beim Trog dabei seits. Wal da Gerbergassler is ja nit forbnblind. I hab ja in de ahn a schoan a bissl iba de Schulta ins Blattl einegschaugt.
Wia da is da Pfeifenberger Karl, der was uns de KELAG vadraht hot. Sogt der Iltis nit unlängst in da Klan Zeitung in da Befragung, er mechet noch a Legislaturperiod machn, damit dass er de Früchte von seina Orbat hamfian kennt.- Ja was wernd des fir ane verdirrtn Kloatzn wern, wonn hiatzt schon von da ganzn Marie, de wos ea sebn grissn hat, nix mehr da is.
Mitn nassn Fetzn ghearat der Dolm ausngjagt aus da Landesregierung und an Spitz drauf, dass es eahm obedraht bis auf Nurdafrika.
Von mir aus kennetn se ja mit senara Bluat und Boden Tupfarei tuan und lassn wos se wollnt, oba mei Gerschtl, und des von meine Kinda, solltn de bedirwign Schwein in Kraut lassn.
Und da schwarze Zottl, der wos vur eahm wor, der hat glei mit unsera Marie auf da Fremdwährungsklaviatur gspült. Is zwoa in Oarsch gangen des Gschaftl, oba is eh wuarscht, pekkn wer ma in Schwund eh lei mir. Dafir kriagt er ja hiatzt 14 x in Landeshauptmann sei Gasch. Und des steht dem Nixnutz ah noch zua, trotzdem se eahm eh schon im Nationalrot zwischnglogat ghabt hamb.
Bua, da bin i ganz schean in Rasch ghemmen, und han mi gfragt was werstn epa du wähln, doss di in näxtn Tog ah noch in Spieagl eineschaugn kannst.
Mir tat zwar was gscheits einfolln, oba wos soll i enk rotn. Hobts des schoan amol gheart, dass ana von de Lemming noch umegedraht und nit obeghupft war ?
In olle an scheanen Gruaß
Da Gerbergassler
