2004-09-02

Im Gassl reitet bold a Birgaweah

De Grausbirn steignt ma auf

So schaug des aus

"Da Birgamasta von Villach mant doss de Schendarmen in Villach Hülfe aus da Bevölkarung brauchatn. Ea will in de degenen Grafftispreia mit Hülfsscheriff aufn Pelz ruckn. Prämie pro vahoftetn Molabuam 5000 Eiro."

Vuar gor nit so longa Zeit hot da Spittaler Burgamasta gwollt Kopfgeld aussetzn, wal se ongeblich in Spittal obn zvül mit de degenen Drogn getandlt homb. Do hon i ma gedocht, jo dos derf jo wohl nit wohr sein. Wos wern se denn noha epa mit de Kapitalvabrecha toan? Derf ma de noha glei auf da offenen Stroßn daschierssn?
Bein dischkrien hon i domols noha ollewal den Stondpunkt vatretn, doss dos in Villach untan Manze sicha net meglich is. So, und hiatzt kimmb dea Manze, den i dos nia und nimma zuagetraut hob dahea, und will a Kopfgeldjogd auf a poor Molabubnen einfiahrn.

Nit dos des hiatzt glabs, doss i fir de Drogntandla oda fia de Graffitisprea ausreit und de gach vateidign tat. Sicha nit. Oba a Rechtstoot werd jo wohl in da Loge sein, mit a poor Rotzbuabm, de wos in da Nocht freme Haisa anmolnt, zan ferte wern. Oda brauch ma bold amol a Birgaweah, doss ma Recht und Urdnung aufrecht holtn wern kennan. Noha tat i mi oba ehrle gsogt, zan fiarchtn onfongen. Wal wia doss ausgeht, wonn auf amol de Ziwüln des Kommando iba Recht und Urdnung in de Hond nehmen, homma schoan vur de Augn gfiahrt krieagt. Und noha sog i guate Nocht, Villach.

Also, lieba Manze, reiß di zsomm, und hass de Schendarmen in da Nocht a bissl genaua schaugn, bevur de ausreitnt, de sich schoan ollewal zruckgsetzt und unta senan Wert gschlogn gfühlt homb. Und de 5000 Eiro, des ols Judasloahn gabet, fiar de werst jo wohl indastwo in da Stodt an Obnehma findn, deas noat hot.


In olle an schean Gruaß

Da Gerbagassla