2004-07-16

Wia 37 Schworze es Gassl bedroht homb

Noch a Auslondsgerbagassla

So a Schinaggl, wonnst ols Kapiten sieghst, lossest bessa obsaufn, sog es Gsetz. ( Quelle: Internet )

Hiazt seima um de 400 Millionen Leit in Eiropa. Und auf amol, vur drei Wochn, worma mir olle, de ma do lebn, von 37 Mangalan ausn Sudan bedroht. De seint nämle auf ana klan Schaluppn im Mittlmea ummadumgetriebn. Ka Ohnung, wia de do hinkemmen seint. Auf olle Fälle, orme Teifl. In Herrgott sei Donk, seint se von an Deitschn Dompfer aussagfischt wurn, ausn Mea. Olle lebn, guat is gongen, nix is gschehgn. Mecht ma manen.

Oba hiatzt hot natirle de groaße Politik, Hond in Hond mit da Birokratie ihrn Auftritt. Wal wonn a Deitsches Schinagl im intanationaln Mittlmea, vur Malta, a poor orme Hansln, vurm Obsaufn rettet, nochan is de groaße Frog, wer werdn noha hiatzt de 37 Leitln durchfuattern. Drei Wochn homb de Herrn auf höxta Ebene zum Beratn gebraucht, bis sa se endle dabarmt homb, und in „schworzn Peta“ in de Itaka zuawe gebeitlt homb. Allan wos in de drei Wochn Geld dafir aufgongen is, z.B. für de Ministakonfarenzn, es Ausruckn von da Küstnwoch, von da Finanzpolizei und da Kriagsmarine (!), allan mit dem Geld hätt ma de Burschn a Weile vaköstign kennen. Oba wuarscht, is eh lei EU-Geld. Und es wichtigste is, doss de Mentschn hiatzt endle untadaschlupft seint, noch senarn Martyrium.

Oba de schockierendste Meldung kimmb an Tog späta. Da Kapiten von da „ Cap Anamur“, dea wos de 37 Schworzn ausn Mea ausagfischt hot, und se damit vurm sichan Tod grettet hot, werd hiatzt wegn Begünstigung von Flüchtlingen in Italien vurs Gricht gstellt. Wal lautn Gsetz hätt ea de 37 Mentschn dasaufn lossn miassn, wia ea festgstellt hatt, doss des Flichtling seint. Da rinnt ma de Ganslhaut kolt iban Buggl obe, und i frog mi, wos is den dos fia grausige Welt.


In olle an schean Gruaß

Da Gerbagassla