2004-08-30
Durchs Gassl rauscht da Vakehr
kärnöl - Nachlese
Mit degenen Transitumadumgschwafl gehngen ma hiatzt de degenen Pleznkepf, egal aus wos fir an Loger, gonz schean auf de Nervn. Wal es is a anzige Umadumliagarei. A typisch östarreichisches Eiertonzn. A Leit-fir-teppat-vakafn. Und de Leit follnt holt wieda amol auf de Politika eine. Derwegn wer hiatzt i amol es Maul aufmochn, ah wonns in de meistn nit passn werd, wos i sog. Zerst de Faktn.
A.) Es hot an Transitvatrog lei von 91 bis 95, olso bis zum EU Beitritt gebn. Danoch hot EU Recht ah fir de Österreicher gegoltn. Und damit ah es Prinzip vom freien Wornvakehr.
B.) Da Klima hot im 94er Johr mitn Ökopunktesystem lei a Ibagongslösung bis 98 ausghondelt. De is noha 2x wegn a poor valetzte Klausln valängat wurn und laft hiatzt endgülte aus. Es homb also sämtliche österreichische Politika vasogt und net de böse, böse EU.
Und hiatzt gemma amol zum Kühlschrank und moch ma Inventur:
A Mozzarella aus Günsburg Donau/D
Milka Tschoklat aus Bludenz
Ane Alen aus Bayern
A Tubn Kunner Majo aus Wean
A Zitronensoftkonzentrat aus Sattlett
Von Rauch a greana Tee aus Rankweil
De Fruhstickmilach aus Wean
A Flaschl Donauprinzessin aus Krems/ Donau
A Roasnmarüllnmamelad aus Stans/ Tirol
A Becha Milfina Sauarahm aus Obaösterreich
Ane Kasscheibn von Clever aus Wr. Neidurf
An Tramezzini Aufstrich von Wojar´s aus Wean
An Grana Padano Kas aus Zane/Vicenca/Italien
Ane mariniertn Forellenfilet aus Roslev/ Dänemark
Frische Eiaspätzle aus Linz
Da skandinavische Reichalax aus Dortmund
Ane Silbazwiebelen aus Stegersboch
A probiotischa Fitnessdrink aus Baden
Heringsalat aus Wean
Metwurscht aus Stainz
A Becha Rama aus Wean
A Buttamilli aus Spittal
A Emmentola aus Lochau/ Vurarlberg
A Jogurt LC 1 aus Frankfurt/Main
Es Felix Ketschap aus Mattersburg
A bissl a Wurscht vom Frierss aus Villach
Und a poor gmischte Bauernerzeugnisse aus Neihaus bei Fürnitz
Tutto paletti 11200 gschätze Elke- Kilometa also allan in mein Kühlschronk. Do is de Speis und es Gewürzfachl noch gor nit dabei. Geschweige denn, des ondare Krafl, wos so im Haus umadumwolgt. So und hiatzt gibs noch de Zohl, fir dejenign de ans und ans nit zsammenzöhln kennent. Lei 11% vom gonzn Lostavakehr werd von de durchfohrendn Losta gmocht. Da Rest laft im Landln.
Wegn wos wernt de Tiroler Schützn und de Kärntner Obwehrkämpfer also aufmarschiern. Vielleicht wernt se de Leit mit da Puffn vurm Gsicht zwingen, senare Sochn lei mehr vur Urt zum kafn. Oda hot wer an ondarn Vurschlog. Vül Spaß beim sinniern.
In olle an scheanen Gruaß
Da Gerbagassla
